જામનગર મોર્નિંગ - જામનગર 

જામનગર શહેર-જિલ્લા સહિત હાલાર પંથકમાં ગત સોમવારથી વીજ તંત્ર દ્વારા વીજ ચેકિંગની કાર્યવાહી હાથ ધરવામાં આવી હતી. અને ગઈકાલે બુધવારે ચોથા દિવસે પણ હાલારમાં ૪૬ વિજ ચેકીંગ ટુકડીઓને દોડતી કરાવાઇ હતી. જેથી વીજ ચોરોમાં ફફડાટ મચી ગયો છે. ગઈકાલે કુલ રૂ. ૫૭.૫૭ લાખની પાવાર ચોરી ઝડપી લેવામાં આવી હતી.

જામનગર પીજીવીસીએલ વર્તુળ કચેરીની ચેકિંગ ડ્રાઇવ દ્વારા સોમવારે જામનગર શહેરના જુદા જુદા વિસ્તારમાં ૨૬ જેટલી વિજચેકિંગ ટુકડીને મેદાનમાં ઉતારવામાં આવી હતી, અને કુલ રુ.૨૩.૧૦ લાખનાં વીજ પુરવણી બિલ આપવામાં આવ્યા હતા.

મંગળવારે પણ વીજ ચેકિંગ કાર્યવાહી હાથ ધરવામાં આવી હતી. અને રૂપિયા ૨૫.૬૫ લાખના વીજ પુરવણી બિલ આપવામાં આવ્યા હતા. જ્યારે બુધવારે ત્રીજા દિવસે વીજ ચેકિગમાં કુલ રૂ. ૫૬.૨૫ લાખના વીજ પૂરવણી બિલ આપવામાં આવ્યા હતા. દરમિયાન ગઈકાલે ગુરૂવારે સતત ચોથા દિવસે પણ વીજ ચેકીંગ કાર્યવાહી ચાલુ રાખવામાં આવી હતી. ગઈકાલે ગુરૂવારે ૪૬ ટીમો દ્વારા ચેકિંગ કરવામાં આવ્યું હતું. જેમાં જામનગર શહેરના વૈશાલી નગર, બેડેશ્વર, પુનિત નગર, રામેશ્વર નગર, નીલ કમલ સોસાયટી અને મહાકાળી સર્કલ વિસ્તાર ઉપરાંત ખંભાળિયા શહેર તેમજ જામનગર તાલુકાના બાલાચડી, સચાણા અને દરેડમાં કુલ ૫૭૨ વીજ જોડાણ તપાસવામાં આવ્યા હતા. જેમાંથી ૯૮ વીજ જોડાણમાં ગેરરિતી જોવા મળી હતી. આવા આસામીઓને રૂપિયા ૫૭ લાખ ૫૭ હજારના વીજ પુરવણી બિલ આપવામાં આવ્યા હતા. ગઈકાલની કાર્યવાહીમાં ૧૦ લોકલ પોલીસ અને ૧૬ એસઆરપી જવાનોની મદદ લેવામાં આવી હતી.